BA-verkefnið komið í fullan gang, gaman, gaman!!

Góðan og blessaðan daginn!

Hvað segið þið gott elskurnar? Það orðið soldið langt síðan að ég ritaði hér síðast sem segir víst mest til um það að það er nóg að gera á þessum vígstöðvum eins og venjulega. Skólinn er kominn á fullt aftur. Ég sem hélt að þessi önn yrði aðeins "rólegri" en sú síðasta þar sem ég er með aðeins færri einingar en ég er s.s enn að læra það, að það er ekkert sem heitir rólegheit þegar maður er að nema sálfræði við Háskóla Íslands!! Eins og titillinn á þessari færslu gefur til kynna þá er BA-verkefnið að komast á fullt skrið. Nú stendur yfir mikil heimildarleit sem er alveg óhemju tímafrekt ferli, við þurfum að leita að endalaust mörgum rannsóknargreinum og lesa þær allar til finna hvað er bitastætt og hvað hentar fyrir okkar verkefni sem þýðir að helmingnum af þeim greinum sem við finnum verður kastað til hliðar sem ónothæfum. Nú, svo erum við að fara í það slá inn öll þau gögn sem við söfnuðum saman inní tölfræðiforrit til tölfræðilegrar greiningar, en um er að ræða allmarga spurningalista sem innihalda misjafnlega margar spurningar sem lagðar voru fyrir ca 170 manns og það var gert tvisvar sinnum svo að þið getið ímyndað ykkur hverskonar handavinna bíður okkar áður en við getum hafist handa við að reikna útúr þessu öllu saman. Eftir að við verðum svo búnar með tölfræðigreiningar og heimildarsöfnun og lestur þá mun hin eiginlega ritgerðarsmíð hefjast. Þetta er auðvitað langviðmesta verkefni sem ég hef tekist á við en um alveg gríðarlega ögrandi, lærdómsríkt og umfram allt skemmtilegt ferli að fara í gegnum allt þetta rannsóknarferli. Við erum stórhuga, metnaðurinn er mikill og við stefnum auðvitað á að fá  háa einkunn fyrir þetta verkefni og þá þýðir ekkert annað en að gefa sig alla í þetta. En það er auðvitað fleira sem hangir á spýtunni, ég hef fullan hug á að reyna að komast að í framhaldsnám í haust og til þess að eiga möguleika á inngöngu þýðir ekkert annað en að reyna vera með sem hæsta meðaleinkunn. 

Ingólfur Páll var að keppa í handbolta í dag og gekk það svona upp og ofan hjá liðinu hans, sigrar og tap svona eins og gengur í þessum íþróttum. Hann stóð sig þó vel sjálfur og mér finnst gaman að sjá ákveðnina hjá honum og oftar en ekki stigur hann upp og fer fyrir sínum mönnum þegar mótlætið verður meira. Flottur strákur!!

Nú, við mæðginin erum ein heima, pabbinn er kominn og farinn síðan ég skrifaði síðast og er s.s aftur floginn til Ameríku. Hann er núna staddur í LA í sól og 25 stiga og ég get nú ekki annað sagt en að ég væri til að vera stödd þar með honum í stað þess að vera í þessu endalausa vonskuveðri hérna á klakanum. Hann ætlar svo að koma heim á þriðjudaginn en það verður stutt stopp þar sem hann mun aftur halda af landi brott á fimmtudaginn og í það skiptið til Swiss en svo verður pása á þessu flakki hjá honum og ég verð hún að viðurkenna að ég verð því nú bara fegin.

En nú ætla ég að stoppa og fara aðeins að slaka á yfir sjónvarpinu, en á morgun ætla ég að vakna snemma og nýta daginn vel í lestur.

Eigið góða helgi, það sem eftir er af henni

Ragna Margrét